دنیا کی سب سے مہنگی گائے جس کی قیمت کروڑوں مں ادا ہوئی

ریکارڈ توڑ فروخت: دنیا کی سب سے قیمتی
گائے کی حیران کن قیمت 

 

برازیل میں ایک نیلامی میں ایک بہت بڑی
سفید گائے نے دنیا کی مہنگی ترین گائے قرار پا کر تاریخ رقم کر دی، یہ گائے 4.3 ملین
ڈالرز میں فروخت ہوئی۔

ساڑھے 4 سالہ نیلور نسل کی گائے جس کا نام ویاٹینا-١٩ ایف ایل
وی مارا آئیموویز ہے، نے یہ فلکیاتی قیمت حاصل کرکے اپنا ہی ریکارڈ توڑ دیا، جو اس
کے اعلیٰ جینیاتی معیار اور خصائص کی عکاسی کرتا ہے۔

ویاٹینا-١٩ ایف ایل وی مارا آئیموویز
نیلور نسل سے تعلق رکھتی ہے، اس نسل کا تعلق بھارت سے ہے اور اس کا نام بھارتی ریاست
آندھرا پردیش کے ضلع نیلور کے نام پر رکھا گیا ہے۔ نیلور گائے اپنی چمکیلی سفید
رنگت سے نمایاں ہوتی ہے،اور عام گائے کے برعکس ان کے کندھوں کے اوپر ایک کوہان ہوتی
ہے۔ ان میں قدرتی طور پر گرم درجہ حرارت کے خلاف زیادہ مزاحمت کی صلاحیت ہوتی ہے،
جو ان کی ڈھیلی، لٹکتی ہوئی جلد، اور کئی یورپی نسلوں کی گائیوں کے مقابلے میں پسینے کے
دوگنا بڑے اور تعداد میں 30 فیصد زیادہ غدود ہونے کی وجہ سے ہے۔

نیلور گائے کئی انفیکشن کے خلاف بھی
مزاحمت کی صلاحیت رکھتی ہے، ان کی جلد کی موٹی ساخت کی وجہ سے خون چوسنے والے کیڑوں
کے لیے اندر گھسنا مشکل ہو جاتا ہے۔ گائے کی یہ نسل آسانی سے افزائش بھی کرتی ہے،
کیونکہ ان میں شرونیی کھلی ہوئی اور بڑی پیدائشی نالیاں ہوتی ہیں، جبکہ بچھڑوں کو
کامیابی سے بالغ ہونے کے لیے انسانوں سے بہت کم سہارے کی ضرورت ہوتی ہے۔ مزید
برآں، نیلور گائے اپنے موثر میٹابولزم کی وجہ سے ناقص معیار کے چارے پر پھل بھی پھول
سکتی ہیں۔

یہ سازگار خصوصیات برازیل میں نیلور
گائیوں کو ناقابل یقین حد تک قیمتی بناتی ہیں، جہاں وہ ملک بھر میں گائیوں کی کل
تعداد کے 80 فیصد حصہ پر مشتمل ہیں۔ برازیل میں تقریباً 167 ملین نیلور مویشی ہیں،
اور انہیں مصنوعی طور پر ان خصائص کو بڑھانے کے لیے تیار کیا جاتا ہے۔ نیلور تخم کی
فروخت برازیل میں گائے کی کل مصنوعی تخمدانی مارکیٹ کا 65 فیصد ہے، اور 2018 کی ایک
گارڈین کی رپورٹ کے مطابق، سب سے قیمتی نسل کے بیلوں کے سپرم کی قیمت 5,000 ڈالر فی
0.55 ملی لیٹر (0.03 اونس) ہو سکتی ہے۔

ویاٹینا-١٩ ایف ایل وی مارا آئیموویز
برازیل کی سب سے اعلیٰ ترین نیلور گائیوں میں سے ایک ہے، اور اس کی قیمت اس کی غیر
معمولی جینیاتی صلاحیت کی عکاسی کرتی ہے۔ اس گائے کو 'کاسا برانکا ایگروپیکوآرا'
نے 'نیلور ایچ آر او' کو 4.3 ملین ڈالر (پاکستانی تقریباً ایک ارب 23 کروڑ روپے) کی
ریکارڈ توڑ قیمت پر فروخت کیا۔ گائے کی ملکیت کا ایک تہائی حصہ 6.99 ملین ریلز یعنی
1.44 ملین ڈالر کے مساوی ارانڈو، برازیل میں منعقدہ نیلامی میں فروخت ہوا۔ اسی
گائے کی آدھی ملکیت 2022 میں تقریباً 800,000 ڈالر میں فروخت ہو چکی تھی، جو اُس
وقت اپنے آپ میں ریکارڈ توڑ قیمت تھی۔

ویاٹینا-١٩ ایف ایل وی مارا آئیموویز
کی فروخت برازیل میں خالص نسل کے نیلور کی حقیقی قدر کی نشاندہی کرتی ہے، جس سے یہ
ظاہر ہوتا ہے کہ کچھ لوگ اعلیٰ جینیاتی معیار کے نمونوں کے لیے کتنی رقم ادا کرنے
کو تیار ہیں۔ یہ اعلیٰ قیمت بین الاقوامی مویشی منڈی میں بھی پھیلے گی، نسل کی قدر
کو نمایاں کرے گی اور دنیا بھر میں اس کی ساکھ کو مضبوط کرے گی۔

کاسا برانکا کی ڈائریکٹر، فابیانا
مارکیز بوریلی نے بتایا کہ "ایچ آر او کے ساتھ ویاٹینا-١٩ نسل کا اشتراک
ہمارے عزم کو پورا کرنے کا ایک شاندار تجربہ ہے"۔

ویاٹینا-١٩ ایف ایل وی مارا آئیموویز
نہ صرف برازیل بلکہ دنیا کی سب سے مہنگی گائے ہے۔ دنیا کی سب سے مہنگی گائے کا
پچھلا ریکارڈ رکھنے والی مسی تھی، کینیڈا کی ایک ہولسٹین گائے جو 2009 میں 1.2 ملین
ڈالر میں فروخت ہوئی تھی۔